وكتبت عفاف مصطفى على صفحتها عل الفيس بوك قائلة : "للي يعرف الشاب ده ياريت تخلوه يتواصل معايا عالخاص ،،انا هاخليه ييجي لي اللوكيشن وفي قت البريك هاخليه سلم و يتصور مع كل نجوم الفيلم  النجوم  النجوم فاهمين يعني إيه النجوم  ؟؟ .. انت علي رأسي يا حبيبي وانتوا الدعم بتاعنا وجمهورنا واللي حصلك ده  مايخليكش تزعل نهائي للعلم  يا إبني  العزيز  ،،  نجومنا متواضعين جداً  معندهمش ديفوهات نفسيه  ولا غاويين  يتمنظروا عالناس او جمهورهم لأن الجمهور هو صاحب الفضل في شهرة الفنان . لكن تعمل إيه في ناس عايشين الدور  و قاصدين بل متعمدين  يعملوا   تريند قدام المصورين  علي حساب شاب تعامل بصفاء نيه و نقاء  وتم كسر الفرحه اللي كانت  باينه في عنيه  لما شاف ممثل ،،  وعد مني  هقابلك بالنجوم يا إبني . حقك علي راسي يا إبني  الكريم اللي ماعرفش اسمه  ..  والله يا حبيبي دمي محروق عشانك من ساعة ما شفت الفيديو  امبارح ... يا إبني الطيب البرئ   انت أكرم  من اي حد قاصد يعمل حركات للفت نظر المصورين عشان  أم الترند الرخيص اللي جنن الناس    ..

 وكان الفنان أحمد عبد العزيز، حرص  على التعليق بشأن واقعة رفضه مصافحة شاب، وقال: "الموقف غاية فى البساطة، كنت رايح أحضر فعاليات مهرجان سينمائى فى مركز الإبداع، وكنت متأخرا حوالى 10 دقائق، وبجرى علشان ألحق المهرجان، وأنا داخل وبحاول أدخل الأسانسير ففى مجموعة من الشباب وواقفة، وأنا شاورتلهم بدماغى بمعنى أهلا ودخلت جرى، ويبدو إن في منهم أحد الشباب بيمد إيده علشان يسلم عليا وأنا مخدش بالى".

وأضاف أحمد عبد العزيز خلال تصريحات تليفزيونية، بعدها مشيت بسرعة علشان أدخل الأسانسير، وفوجئت بعد انتهاء المهرجان بهذا المقطع المنتشر ومحقق مشاهدات عالية وتعليقات سلبية من ناس كتير".

ونفى أحمد عبد العزيز أن يكون مغرورا أو متعاليا على هذا الشاب، قائلا:" انا راجل بسيط وغاية فى البساطة وشديد التواضع، ومافيش فنان عاقل يتكبر على جمهوره أو يرفض مصافحة حد، ودى مش أخلاقى ولا طبيعتى، انا راجل ابن بلد".

ووجه أحمد عبد العزيز رسالة للشاب قائلا:" لو كان زعل أو خد على خاطره فهو فى النهاية ابنى ومستعد أطيب خاطره وبقوله مخدتش بالى انت بتحاول تسلم عليا، وانا الشباب بالنسبة ليّ مهم جدا فى بلدنا اللى أكتر من 60% من تعدادها فى سن الشباب".

وأكد أحمد عبد العزيز:"أنا من الداعمين للشباب، وهو اللى هيحافظ على البلد، ومصر ستظل فى خير ومحفوظة". 

يمكنك مشاركة الخبر علي صفحات التواصل