http://elyomnew.com/ReadersNews/Details/197?n=صرخة_معلم_

اليوم الجديد

الأحد 9 أغسطس 2020 - 20:06
رئيس مجلس الإدارة
أحمد التلاوي
رئيس التحرير
إبراهيم موسى
صرخة معلم

صرخة معلم


مش هحكي قصة ولا هقول شعر انا هفتح الشنطه واطلع منها 130جنيه مصري باقيين من المرتب واسيبك تخمن احنا يوم كام في الشهر ولو حبيت ادي درس ابقى مجرم لا انا مش مجرم مش بتاع دروس عشان ممدش ايدي واحافظ على كرامة المعلم ايوه لسه موجودة بس انا صابر يا عم صابر وراضي

وكمان اب لابناء ووولي امر وبحافظ علي الطلبه زي اولادي لكن لو عنفتهم زي اولادي يجي ابوه يقولي بتعنفه؟! دا هو اللي موكلك وهو اللي مقبضك وهو اللي مشربك انا اسف يا ابوه ويا بويا ويا اخوه ويا اخويا

مش هكلمه تاني.  ايه؟مش هتكلمه يعني هتهمله دانت مقصر والواد مستواه الثقافي والفني نزل بسببك يا مهمل بس انا صابر يا عم صابر وراضي دا شغلي اعلم واصبر وارضى

الواد محروس شعره طويل يا محروس قصر شعرك احلق يبني تفضل نضيف.  بتقول ايه يا استاذ؟! دا ابويا عايزه كدا واطوله كمان وكمان دي حريه شخصيه.  انا اسف يا محروس واسف لابوك وابويا واسف لاخوك ولاخويا.

وانتي يا زينب لبسك ضيق حافظي علي نفسك يا بنتي محدش يبص عليكي.  نعم نعم!! وانت مالك هو انت بتبص عليا دي فيها قضيه وامي عايزاني علي الموضه الحاليه

ولا مش عاجباك امي كمان دي تاني قضيه.

انا اسف يا زينب لامك ولامي مربتنيش علي الموضه الحاليه وفي مثل سمعته زمان احترس من تلات حاجات ينتهوا بحرف (ت) بنات _ماليات _امتحانات

خلاص  سيبك من موضوع التربية وخلينا في التعليم اصل التربيه علي الموضه وانا متربتش.. عليها

قلت اشتغل شغلانه تكمل مصروف الشهر واكفي بيتي وايجاري واولادي لقيت شغلانه تانيه من بعد المدرسة لحد نص الليل

اصحي يا استاذ الصبح مش قادر خبط دماغي في الحيطه وصحيت وجريت علي المدرسه اتاخرت خمس دقايق مصيبه امضي في التأخير ومفيش حافز ولا تقدير كدا الماهيه قلت قلت وماله انا صابر وراضي وصابر يا عم صابر دخلت الفصل لقيت عيل صور زميله بتعمل ايه يا عوض. دا انا رفعتها علي النت يا استاذ ههههههه. نت ايه يا ولد وبتصوره ليه وهو بيرقص ولا نايم ولا قايم ولا حتي خالع. دا احنا بنهزر يا استاذ ومفيش مشاكل وادي التليفون قفلته يا استاذ ويلا نبدأ الحصة.  وفجاه عربيات وموتوسيكلات ولجان وحكوه.  هو في ايه يا ولاد.  طلع بيه افندي ببدله وكرافته زي بتوع المكاتب.  مين صور يا وكان عليكوا مين؟ 

يا واقعة سوداء في ايه يا بيه؟!

انت موقوف ومتحول للتحقيق ومعاك ناس تانيين والكل محققين

وهنخصم منك ملايين. مانتوا مش مدرسين دانتوا مهملين.

روحت البيت حزين اعملك ايه يا ضمير؟ قلت افتح التليفزيون يهون عليا شويه من الفكر والتهوين ببص لقيت مفاجاة الفنانه القديره والنجمة الساطعة بتتكلم علينا وبتقول علينا صايعين وفي الثانوي فاشلين معاكي حق يا فنانه مانت نجم ساطع واحنا المعلمين المكتومين بس احنا برده صابرين.

قلت اغير القناه وشكراً للفنانه صاحبة السمو والعلو ببص علي القناة التانيه لقيت فيها حفله جميله قلت نفرفش شويه لقيتهم بيقولوا الفنان المطرب الجميل اخدت في الحفلة ملايين ونعنش النعانيش وملا بالفلوس النيش.

ملايين وولادي للقرآن حافظين ومحدش بيسالهم انتوا ولاد مين؟ 

وفي غيرهم كتير ياعم كبر دماغك احنا عايزين نعانيش وسيبك من التهبيش والتهميش

الغرض مش هطول عليكوا رجعوني الشغل تاني والحمد لله

قالوالي جالك جواب امتحانات يبختك يعم اسبوع امتحانات بس وهتاخد فلوس كتييييييير يجي سبعييييييين جنيه اصرف واتبسط قلت كويس فرجت علي اولادي كيلو الا ربع لحمه اخيراً.

رحت الامتحانات اوعوا تغششوا الاولاد واوعي تغشوا ياولاد يابني بص في ورقتك!  جرى ايه يا استاذ انت معصبني وعاملي خايله كدابه واخواتي مستنيني برا والله لاقولهم

وابقي اطلع الشارع ناديت علي رئيس الدور طبعاً فاهمين قالي جرا ايه يا استاذ متمشي حالك بس اوعي يغشوا الاولاد بيشتكوا منك وجايلك محقق كمان وطاروا السبعين جنيه

انا اسف يا نظام واسف يا مجتمع واسف يا فنانه وانت يا فنان انا بس كنت بفضفض. 

الله يرحمك يابا فرحتك بعلامي كانت كبيرة بس انا بقيت استاذ ومش هسيب وصيتك ليا وهفضل اعلم الاولاد حتي علي حساب صحتي مانا ابن البلد دي ولي احلام فيها اشوفها احسن بلد ما كلهم اولادي

وانت كمان يا وزير الله يعينك علي التطوير الموضوع محتاج تفكير وتدبير محتاج جيل جديد يقدر يشيل ويشيل ويحبها بقلبه

الله يرحمك يابا لو كنت طلعت صنايعي كنت اكيد هفيد بس من غير طلطيش ولا تهميش