كيف تُطفّشين عريسًا في خطوات بسيطة

كيف تُطفّشين عريسًا في خطوات بسيطة

تطفيش عريس صالونات للبعض يُعتبر "استعلاءً على النعمة" و"احمدي ربنا إن فيه حد جاي يتقدم لك"، حسنًا لو كنتِ من هذه المجموعة هنيئا لكِ، وإن كنتِ مبتحبيش الطريقة دي أو مرتبطة ولسه مش قايلة لأهلك فتتبعي الخطوات دس.

1- ناقشيه:

أنا شخصيًا عملت كده مع مهندس كان جاي يخطبني ومش عايزني أشتغل وبيتكلم على حرية الستات وخروجهم للعمل بشكل مهين، فاديته اللي فيه النصيب ومشي متضايق، بس كان كله بالذوق وبالهدوء، واتجوزت جوزي اللي كنت وقتها مرتبطة به ومش قايلة لأهلى، عشان لسه ما جهزش ماديا.

أي كلام يقوله لازم تناقشيه فيه، زي لو قالك "باحب المحشي البتنجان"، قولي له "وليه مش بتحب ورق العنب؟" مع إنه أسهل في العمايل ومِزز.

لو قالك "بحب الست اللي بتشتغل"، قولي له "آه عشان تساعدك في المصاريف؟ واللا عن اقتناع؟".

لو قالك مش "باحب الست اللي تشتغل" قولي له "ليه بقى انتَ ضد حرية المرأة؟".

2- تدمير أحلامه وخططه:

 لو عنده شقة –ما شاء الله يعني- قولي له إنك مش حابه تقعدي في المنطقة دي عشان شعبية قوي أو متطرفة قوي أو هاي كلاس قوي، لو بيفكر يشتري شقة قوليله "لازم تبقى جنب مامتي عشان مش بقدر أفارقها، حتى كل اليوم هقضيه عندها، وهروَّح على النوم بس، خاصة لما نجيب عيال".

لو هياخدك ويسافر ده مبرر قوي لرفضه، وهو الجاني على نفسه، قولي له "أنا باحب مصر وبعشق ترابها، ومقدرش أسيب صحابي ولا أهلي".

الزواج على الطريقة الحديثة
الزواج على الطريقة الحديثة

3- الرخامة عليه بشكل غير مباشر:

يعني لو دكتور قولي له "مبحبش ريحة المستشفيات ولا البنج، ويا ترى انتَ بقي في حكومة وإهمال وموت، ولَّا خاص بتشفط دم الناس".

لو مهندس اتكلمي عن البيوت اللي بتقع والمباني اللي شكلها كئيب، والتشويه البصري، ويا سلام لو تدخلي على الإنترنت قبلها تعملي سيرش على الحاجات دي بالأرقام والأمثلة.

لو لابس ألوان فاتحة انتقديها، ولو بيشرب سجاير اتكلمي عن الآثار السلبية لها، وإن السنان بتغمقّ من التدخين، حتى بُص في المراية هتلاقيها صفرة أهو.

لو هيعيش مع مامته اتكلمي عن الناس الللي عندهم عُقَد نفسية بتخليهم يلزقوا في أمهاتهم، واتكلمي عن رواية "السراب" لنجيب محفوظ، وإزاي كامل كان معقد بسبب إن أمه كانت بتلبِّسه لبس بنات وهو صغير، ومنعته يتعرف على بنات، ويوم ما اتجوز كان عنده عجز جنسي.

4- خليكِ جريئة:

ما تتكسفيش تُذكري قدامه كلمة "جنس" في جملة علمية باللغة العربية الفصحى، ويا ريت لو تتعمدي تعملي ده لأنه أكيد أكيد هينزعج وهيقول عليكِ وشك مكشوف، مع إنها كلمة عادية، بس أغلبية رجالة مصر بيعتبروا ده مؤشر لقلة الأدب، مع أنهم ما بيبطلوش يقولوا كلام أبيح لبعض بهزار، وإن فعل الممارسة الجنسية بلفظه الشعبي بيتقال بينهم عادي كإشارة لتأديب طرف لطرف آخر "ده أنا ها... أما أشوفك يا مجدي".

قولي الكلمة دي بشكل جاد ومحترم في أي جملة علمية، وأكيد – بنسبة كبيرة – هينزعج ومتقلقيش ماحدش هيقدر يغلطك، لأنِّك كنتِ بتتكلمي عادي هو اللي خياله مريض.

متقعديش مكسوفة بقى ووشك في الأرض والكلام ده.. اعتبريه زميل عمل جديد جاي يتعرف عليكم في الشغل، بصي في وشه عادي، واعرفي امتى تتكلمي وامتى تسكتي، واعتبري نفسك في مناورة نفسية كلامية معاه، والهدف هو تكسير خطط العدو.

 5- خليكي ناتشورال:

لبسك مش واو قوي ولا تروحي تشتري لبس جديد، اهتمي لبسك يبقى نضيف ومكوي وبسيط، عشان ما يحسش إنك مهتمية بزيارته، ويا ريت لو تلبسي بنطلون عشان متبقيش بتبيني الحتة الأنثوية اللي فيكي قدامه، وبتبيني الحتة العملية البسيطة.

المكياج مش مهم إلا لو طبيعتك كده بتحطي ماكياج وانت نازلة تجيبي عيش عادى.. حطي كحل وكريم مرطب وروج هادي جدا.

6- بلاش الصينية:

أبوس إيدك بلاش حركة الدخول بصينية الحاجة الساقعة أو العصير، حتى لو انت ناوية تتجوزيه ومش هتطفشيه، حركة قديمة وفيها خضوع كده للراجل، إلا لو بتحبي الخضوع والهيمنة فاتكلي على الله وشيلي الصينية.

التعليقات