اسم الوردة

اسم الوردة

- ألف ألف مبروك يا محمد..

- الله يبارك فيك على إيه؟

- بنتك اللي اتولدت أول امبارح! انت نسيت ولا إيه؟

- بس انت عرفت ازاي؟

- ما انت حاطط صورتها على الفيسبوك!

- آه!

- إيه انت مش مركز خالص!

- معلش بقى لي كذا يوم ما بانامش..

- هي الفترة الأولانية دي بتبقى صعبة.. دي حاجة معروفة..

- عرفت خلاص!

- وهتسميها إيه؟

- مش عارف لسه..

- مش عارف ازاي؟ المفروض تروح تطلع لها شهادة ميلاد عى طول.. ولا هتسيبها من غير اسم؟

- ما المشكلة إني مش عارف أسمّيها..

- كل الأسامي اللي في العالم دي مش عاجباك؟

- ما الأسامي كثير بس المشكلة إن أنا وأمها مش متفقين على أي اسم منهم.. وحماتي كمان داخلة في الموضوع..

- ما تخليش حماتك تتدخل.. المفروض ده يبقى بينك وبين مراتك بس..

- ما مراتي وحماتي وجهين لعملة واحدة.. ما فيش أي فرق بينهم.. اللي باقوله لمراتي بيكون بتفاصيله عند حماتي بعد ساعة..

- بس ده مش كويس..

- دول بيتكلموا في التليفون ما بين 3 و4 ساعات كل يوم.. عارف لما تبقى كل تفصيلة صغيرة في حياتك عند حماتك؟ أهو واحنا قاعدين في الشغل دلوقت زمانهم بيتكلموا في التليفون..

-  للدرجة دي؟

- أنا مشترك لها في باقة ستار بتدي 2400 دقيقة لموبينيل في الشهر.. تخيّل على نص الشهر بتكون الباقة خلصت فيتكلموا ع الأرضي..

- وما بيزهقوش؟ هو الكلام ما بيخلصش؟

- لما تبقى كل تفاصيل الحياة بتتحكي كل يوم هيخلص الكلام ازاي؟ ما هي بتحكي لها كل حاجة بلا مبالغة..

- كل حاجة كل حاجة؟

- أنا شاكك كمان انها بتحكي لها تفاصيل اللقاءات الحميمة بس مش متأكد..

- لا يا راجل مش معقول..

- باحس كده من نظرات حماتي..

- وبتحسها ازاي دي؟

- مش عارف أشرح لك ازاي.. بس بيبقى فيه نظرات معينة بتبقى متفقة مع الأحداث اللي حصلت.. فاهمني؟

- لا.. بس مش مهم! وانت ما بتكلمهاش في الموضوع ده؟ يعني ما بتحاولش تنصحها تداري شوية على شمعتها؟

- أكيد اتكلمت معاها كثير.. ودايما المواضيع تقلب بنكد وخناقات وخصام لمدة كذا يوم.. في الآخر كبرت دماغي وبقيت أسيبها تعمل اللي هي عايزاه وخلاص..

- بس كده غلط..

- أي حاجة أحسن من النكد في البيت..

- وهتعمل إيه في موضوع الاسم؟

- حماتي عايزة تسميها اسم إسلامي زي شيماء أو لمياء..

- بس لا شيماء ولا لمياء اسم إسلامي!

- ما أنا عارف.. بس هي مخها كده! اقترحت كمان خديجة وزينب وحفصة.. بس مراتي هي اللي اعترضت على الأسماء دي..

- ومراتك موافقة على شيماء ولمياء؟

- أيوة بس أنا مش عاجبيني..

- انت عايز تسميها إيه؟

- عايز اسم عربي ويكون لطيف كده.. حاجة زي وردة أو أمنية أو أسمهان..

- أسمهان اسم فارسي على فكرة مش عربي..

- ما كنتش أعرف.. وفكّرت كمان في اسم من الأسماء بتاعة أميرات العيلة المالكة من أيام فاروق.. فريدة أو فريال أو نازلي..

- فريدة ونازلي كانوا ملكات مش أميرات على فكرة.. انت محتاج تذاكر شوية تاريخ..

- مش مهم.. المهم انها أسماء حلوة..

- وهم مش موافقين طبعا..

- لا..

- طيب ما تشوف حل وسط.. يعني نقي اسم على وزن شيماء علشان حماتك تفتكره إسلامي وفي نفس الوقت يكون عاجبك..

- زي إيه؟

- فيه أسماء كثير.. هات ورقة وقلم وأنا هاقترح عليك اقتراحات تفكر فيها..

- ماشي..

- إيه رأيك في أسماء؟

- لا

- هناء؟

- لا

- ولاء؟

- لا

- علياء؟

- لا

- سناء؟

- لا

- إسراء؟

- لا

- ضياء؟

- ضياء ده اسم ولد..

- علاء؟

- انت هتهزر بقى؟

- شكلك هتحيرتني معاك.. طيب ولاء؟

- ما انت قلتها قبل كده..

- ممممممممممم.. آلاء؟

- لا

- ثناء؟

- مش حلو..

- أنا قلت لك صفاء؟

- لا ما قلتش.. بس مش حلو وقديم قوي..

- غيداء؟

- ثقيل قوي..

- طيب.. أنا خلصت الأسماء الإسلامية اللي عندي وولا واحد عاجبك..

- هي دي كانت أسماء إسلامية؟!

- على قد مخ حماتك!

- مش عارف أعمل إيه..

- ما تشوف اسم زي نيفين أو نرمين أو جرمين أو حاجة م الحاجات دي..

- حاجة آخرها "إين"؟

-  فيه كمان ناردين ونادين وشيرين.. وكل ما تخلف بنت تسميها حاجة آخرها "إين".. أنا واحد صاحبي مخلف 5 بنات: نرمين ونيفين وجوسفين ومادلين وجاكلين..

- بس مادلين وجاكلين دي مش أسماء مسيحية؟

- ما هو صاحبي ده مسيحي..

- مش عارف..

- آه نسينا كمان اسم هيفاء.. إيه رأيك؟

- مش هينفع.. هتقول ده عايز يسميها على اسم هيفاء وهبي..

- يا سلام!

- أيوة هتعمل مشاكل..

- طيب ما دام بتخاف من مراتك وحماتك كده سميها شيماء..

- لا مش هاسميها شيماء..

- يا واد يا جامد انت! وهتقدر تقف لحماتك ومراتك؟

- تقف لحماتك ومراتك؟ انت ليه عايز تصورها على إنها معركة؟ الموضوع مش معركة.. الموضوع بالتفاهم..

- ما هم مش عايزين يتفاهموا معاك وعايزين اللي على مزاجهم بس..

- أنا ما باحبش الخناق والجدل.. وبعدين في أي موضوع لازم حد يتنازل للتاني علشان الحياة تمشي..

- واللي بيتنازل ده ليه دايما يبقى انت؟

- لا مش دايما طبعا..

- خلاص قرر اسم وروح قل لهم عليه..

- مش هيرضوا.. هم مصممين على الأسماء اللي في بالهم..

- طيب انت واجع دماغي ليه من الصبح وعمال أفكر لك في أسماء وبتاع وانت عارف إنه مافيش فايدة؟

- كنت عايزك تشوف لي حل..

- طيب أنا عندي ليك حل فعلا.. روح من وراهم طلع لها شهادة ميلاد بالاسم اللي انت عايزه  وحطهم قدام الأمر الواقع..

- ما ينفعش الكلام ده..

- ليه؟

- حاجة زي كده ممكن توصل بينا للطلاق..

- طيب يبقى أحسن حاجة تسميها شيماء..

- انت شايف كده؟

- آه.. وقوم من قصادي يا محمد عشان رفعت لي الضغط..

التعليقات